Тазабек Икрамов Орозодо Кемпир-Абад боюнча камакта отургандарды кечирүүнү суранды
Жогорку Кеңештин депутаты Тазабек Икрамов бийликти Орозо айында Кемпир-Абад боюнча кармалгандарды бошотууга чакырды. Эл өкүлү бул тууралуу Facebook баракчасына жазып, Орозо айында кечиримдүү да болуу керектигин белгиледи.
"Ар бир нерсенин тартиби, эрежеси болот. Орозо кармоонун да эрежелери бар - ооз ачуу, ооз жабуу. Андан тышкары бул айда кечиримдүү болуу, бирөөгө кыянаттык кылбоо, калп айтпоо жана башка деген Кудайдын өкүмдөрү бар.
Айтайын дегеним, мекенге күйгөн эр-азаматтарыбыз, эже-карындаштарыбыз бүгүнкү күндө күнөөсүз камакта отурушат. Бийликтин душмандары башкалар. Кемпир-Абад боюнча кармалгандарды кечирип коюңуздарды суранам. Алар абакта отуруп, мамлекетке кереги тийбесе да, үйүндөгү жакындарына көбүрөөк керек", - деди депутат.
Белгилесек, Кемпир-Абад боюнча кармалгандар акыйкатчыга кайрылып, көз карандысыз дарыгерлер комиссиясын түзүүнү өтүнүшкөн.
