Депутат майыптыгы бар балдардын алиментин көбөйтүүнү сунуштады
Депутат Махабат Мавлянова ден соолугунан мүмкүнчүлүктөрү чектелүү балдар үчүн алимент төлөмдөрүн көбөйтүүнү сунуштады. Бул тууралуу ал 17-июнда Жогорку Кеңештин жыйынында билдирди.
Эл өкүлүнүн айтымында, көпчүлүк учурларда аталар майыптыгы бар балдарын таштап кетишет, баланы апасы жалгыз тарбиялайт. Ошол эле учурда аялдар жеке жардамчы катары болгону 8000 сом алышат.
"Мындай балдар үчүн алимент жалпы негизде төлөнөт, бирок чыгымдары көп. Дарылоо жана процедуралар зарыл. Эмне үчүн аталар ден соолугунда көйгөйлөрү бар балдары үчүн көбүрөөк алимент төлөшпөйт? Жүк толугу менен энелердин мойнунда калып жатат. Министрлер кабинети жана тиешелүү мамлекеттик органдар өзгөртүүлөрдү киргизип, балдарынын дарылануу чыгымдарын атасына жүктөөнү талап кылса жакшы болмок", - деди Мавлянова.
