Чет элдик номерлүү унааларды легалдаштырууга акыркы мүмкүнчүлүк берилди
Чет элдик номерлүү унааларды мыйзамдаштырууга ушул жылдын 1-сентябрына чейин убакыт берилди. Тиешелүү жарлыкка Садыр Жапаров кол койду.
Жарлыкка ылайык, чет элдик номерлүү унаалардын ээлери акыркы легалдаштыруу процедурасынан өтүп, унааларды Кыргызстандын чегинен тышкары экспорттоп, запастык тетиктерге сата алышат же кайра иштете алышат.
Документте 2024-жылдын 31-декабрына чейин Кыргызстанга импорттолгон, мамлекеттик каттоодон өтпөгөн унаалар гана легалдаштырылат деп айтылат. Ошондой эле уруксат учурда атайын унаа токтотуучу жайлардагы унааларга да тиешелүү.
Кошумча легалдаштыруу бир жолку жана акыркы болуп, кайра узартылбай турганы өзгөчө баса белгиленет.
Ал эми 1-сентябрдан кийин өлкөдө уруксаты жок унааларды иштетүүгө тыюу салынат. Эгерде ээлери жарлыктын талаптарын аткарбаса, алардын унаалары адистештирилген унаа токтотуучу жайларга киргизилип, кийин соттун чечими менен жок кылынат.
Жарлык расмий жарыялангандан он күн өткөндөн кийин күчүнө кирет.
