Бишкекте унаа уурдаган жаран кармалды
Бишкекте УПСМ кызматкерлери унаа уурдоого шектүүнү аныкташты.
Жабырлануучу Ленин райондук ички иштер башкармалыгына жазуу түрүндө арыз менен кайрылган. Анын айтымында 5-ноябрда саат 22:45 чамасында Бах-Гагарин көчөлөрүнүн кесилишиндеги соода борборунун жанынан "Дэу Матиз" үлгүсүндөгү унаасын белгисиз адамдар тартып алып, качып кеткен. Бул тууралуу аталган башкармалыктын басма сөз кызматы билдирди.
Ыкчам-иликтөө иш-чараларынын жүрүшүндө кылмышка шектүү 1992-жылы туулган Б.Р., убактылуу кармоочу жайга камалган. Андан ары иликтөө үчүн Ленин райондук ички иштер башкармалыгына жеткирилгени кабарланды.
Аталган факты Ленин РИИБнин ЭППКсына катталып, КР Кылмыш-жаза кодексинин "Автотранспорт каражатын уурдоо" беренесинин негизинде сотко чейинки өндүрүш иштери башталган.
