Мектеп бүтүрүүчүлөрүнө кече уюштуруп, шаан-шөкөт кылууга тыюу салынганы эскертилди
Быйыл өлкө боюнча "Акыркы коңгуроо" салтанаты 29-майда өтөт. Буга байланыштуу Ички иштер министрлиги жана Агартуу министрлиги бүтүрүүчүлөрдү коопсуздук эрежелерин сактоого чакырат.
Белгиленгендей, коомдук тартипти жана жол кыймылынын коопсуздугун камсыз кылуу максатында милиция күчөтүлгөн тартипте кызмат өтөйт. Эс алуу жайлары, кафе-ресторандар, көл жээктери жана автоунаа жолдору көзөмөлгө алынат.
Бүтүрүү иш-чараларына байланыштуу мектептен тышкары кошумча кечелерди уюштурууга, фейерверк жана кооптуу каражаттарды колдонууга, ошондой эле жашы жете электердин унаа башкаруусуна жол берилбейт.
Ички иштер министрлиги жана Агартуу министрлиги ата-энелерди, мектеп жетекчилерин жана бүтүрүүчүлөрдү мыйзам талаптарын сактоого жана балдардын коопсуздугуна өзгөчө көңүл бурууга чакырат.
