Унаанын терезелерин караңгылатууну 15 миң сомго арзандатуу сунушталды

Министрлер кабинети унаанын алдыңкы каптал терезелерин арзандатылган тариф менен караңгылатууга мүмкүндүк берүүчү токтом долбоорун талкууга чыгарды.

Ага ылайык, 10-июндан 10-июлга чейин атайын акция өткөрүү сунушталууда. Көрсөтүлгөн убакыттын ичинде жеңил унаалардын, жол тандабастардын (электромобилдерди кошпогондо) ээлери убактылуу төмөндөтүлгөн тарифтерден пайдаланууга укуктуу болушат.

Тема боюнча:

Унаанын алдыңкы терезелерин караңгылатуу 30 миң сомго арзандады. Акциянын шарты кандай?

Документке ылайык, акциянын алкагында баа 15 000 сомго (150 эсептелген бирдик) арзандайт:

• жеке жактар үчүн - 50 000 сомдун ордуна 35 000 сом;
• юридикалык жактар ​​үчүн - 70 000 сомдун ордуна 55 000 сом;
• чет элдиктер үчүн - 90 000 сомдун ордуна 75 000 сомго чейин.

Мыйзам долбоорун Президенттин Иш башкармасы иштеп чыккан. Демилгечилер бааларды убактылуу төмөндөтүү боюнча буга чейинки практика абдан натыйжалуу болгонун белгилеп, кыска мөөнөттүү арзандатуулар суроо-талаптардын кескин көбөйүшүнө алып келип, терезелерди караңгылатууну мыйзамдаштырып, мамлекеттик кирешелерди бир топ көбөйтөт деп белгилейт.

Башкы беттеги сүрөт иллюстрациялык.