Кийинки жылы өлкөдө пластик буюмдарын өндүрүүгө, сатууга тыюу салынат
Жаратылыш ресурстары, экология жана техникалык көзөмөл министрлиги айрым желим буюмдардын жана полимердик пленкалардын жүгүртүүсүн чектөөнү этап-этабы менен киргизип жатат. Буга байланыштуу 2027-жылдан баштап желим баштыктарды жана пластик буюмдарды өндүрүүгө, сатууга тыюу салынат.
Министрликтен белгилешкендей, бизнести, өндүрүүчүлөрдү жана импорттоочуларды уруксат берилген альтернативдик экологиялык буюмдарга жана баштыктарга өтүүгө өз убагында даярдоо максатында системалуу маалыматтык үгүттөө жүргүзүүдө.
Пластик жана андан келип чыккан булгануу адамдын ден соолугуна терс таасирин тийгизет, ал биздин организмге күн сайын пластик менен болгон өз ара аракеттенүүдөн улам микро- жана нано-бөлүкчөлөр түрүндө кирет, бул тамак-аш, таңгак, суу, аба аркылуу болот. Ар кандай технологиялар менен жасалган пластик буюмдардын чириши орточо эсеп менен 400дөн 700 жылга чейин созулат. Полиэтилен баштыктар жаратылышта 100-200 жыл бою чирип, туруктуу органикалык булгоочу заттар болуп саналат.
Башкы беттеги сүрөт иллюстрациялык.
